DOEKPOEDING
5 koppies meelblom
1 koppie ontpitte rosyne
5 eiers, geel en wit geskei
1 koppie dadels
1½ koppie appelkooskonfyt
½ teelepel gerasperde neut
1 koppie botter
2 eetlepels koeksoda
1 koppie suiker
½ koppie melk
½ teelepel sout
Room botter en suiker saam en voeg die geklitste eiergele by. Voeg die
appelkooskonfyt by. Snipper die dadels en voeg die rosyne by. Los die koeksoda
op in die melk en gooi dit oor die vrugte. Voeg dit by die bottermengsel. Sif
die droë bestanddele saam en voeg dit by die mengsel. Klop die eierwitte styf
en vou dit in die mengsel in. Smeer ‘n linnedoek met botter en sprinkel
meelblom oor. Skep die mengsel daarin en bind die doek toe. Los egter genoeg
spasie vir die poeding om te rys. Plaas die poeding in kokende water en plaas
die deksel van die kastrol op. Stoom vir 3 uur lank. Bedien met ‘n sous van jou
keuse, maak ‘n lekker wynsous smaak heerlik hierby.
INGEDAMPTE MELKPOEDING
1 blik ingedampte melk (Ideal melk)
1 blik Caramel Treat kondensmelk
1 koppie kookwater
1 pakkie appelkoosjellie
Plaas die ingedampte melk oornag in yskas. Los die jellie op in die
kookwater en laat afkoel. Klits die ingedampte melk tot styf en voeg die
kondensmelk by. Voeg die jellie by en meng goed. Gooi in ‘n poedingbak en plaas
in yskas om te stol.
DANIEL SE TRIFLE
1 gebakte Swissroll
4 koppies dik vla (louwarm)
1 pakkie framboosjellie (aangemaak en gestol)
3 groenvye, gekap in stukkies
1 pakkie lemmetjiejellie (aangemaak en gestol)
2 koppies soetwyn (enige soort)
1 pakkie aarbeijellie (aangemaak en gestol)
½ koppie gekapte okkerneute
2 stukke gemmer, in stukkies (wat in stroop lê)
500ml room, styf geklop
3 stukke waatlemoenkonfyt, in stukkies
10 rooi kersies
1 pak Romany Creams of klapperkoekies
``100's & 1000's''
Pak 'n deurskynende diep glashouer van bodem tot kant uit met dun
gesnyde Swissroll-skywe styf teenmekaar. Giet die soetwyn oor die koek sodat
dit deurnat is. Sny die gestolde jellie (al die soorte) in klein blokkies en meng
dit. Skep 'n laag in bak, pak 'n paar Romany Creams op en gooi stukkies vye,
waatlemoenstukke en gemmer bo-op. Gooi dan toe met vla lekker dik. Herhaal
proses totdat alles klaar is. Versier met room en kersies en ``100's &
1000's''. Laat staan vir 10 uur voor eet.
LEMOENHEERLIKHEID
26 malvalekkers
¾ koppie water
1 suurlemoen se skil
3 lemoene se sap
1 koppie room, geklop
Verhit die water in ‘n dubbelkastrol en voeg lekkers by. Verhit tot die
lekkers gesmelt is en laat afkoel. Voeg die sap en skil by. Voeg die geklopte
room by. Plaas in die yskas om te stol.
SKRIKKELJAARPOEDING
110ml margarien
125ml suiker
2 eiers (geskei)
250ml ongesif afgemeet koekmeelblom
10ml bakpoeier
knypie sout
375ml melk
25ml strooisuiker
100ml fyn appelkooskonfyt
Stel die oond op 180C en smeer ‘n vuurvaste skottel van 24cm in
deursnee. Klop die maragrien en suiker saam tot romerig. Voeg die eiergele by
en meng. Sif die koek meelblom, bakpoeier en sout saam en roer beurtelings met
75ml van die melk by die suikermengsel. Gooi die beslag in die bakskottel en
bak vir 30 minute. Klits die eierwitte en strooisuiker saam tot styf, net voor die
poeding uit die oond gehaal moet word. Haal die poeding uit en gooi die
oorblywende melk bo-oor. Smeer die konfyt bo-op en bedek met die eierwit. Plaas
terug in die oond en bak nog ‘n paar minute tot die meringue verbruin. Sit warm
voor.
Lewer 6 porsies.
GEBAKTE GRENADELLA TERT
KORS:
150g botter
250ml versiersuiker
2 groot eiers
500ml koekmeelblom
125ml fyn amandels
3ml fyn kaneel
VULSEL:
250ml room
110g grenadellamoes
25ml mielieblom
6 eiergele
125ml strooisuiker
125ml amandelsplinters
BOLAAG:
110g grenadellamoes
12.5ml mielieblom
KORS:
Meng botter en versiersuiker in voedselverwerker. Voeg eiers by en meng
goed. Voeg meelblom, amandels en kaneel by, meng om bal te vorm. Haal uit,
draai in kleefplastiek toe en sit in yskas vir 1 uur. Rol uit en voer ‘n 220mm
tertbord uit. Prik boom. Sit tertpan in yskas vir 20 minute. Voorverhit die
oond tot 200C. Bak vir 12 minute, haal uit en laat afkoel.
VULSEL:
Meng room, grenadella en mielieblom, verhit tot warm. Klits eiers en
strooisuiker in boonste deel van dubbelkoker tot lig en skuimerig. Klits warm
roommengsel by. Roer oor hitte tot dik. Gooi uit, koel af. Strooi amandels in
tertdop, maar hou ‘n paar eenkant vir versiering. Skep vlamengsel in tertdop.
BOLAAG:
Verhit die grenadellamoes en mielieblom tot begin verdik en skep bo-op.
Versier met res van amandels. Bêre in yskas tot met opdiening.
PAVLOVA MET KARAMEL EN PIESANG
MERINGUE:
8 ekstra-groot eierwitte
375ml strooisuiker
VULSEL:
379g karamel kondensmelk
250ml room
60ml melk
60ml karamel-kitspoeding
125ml dik jogurt
6 ryp piesangs in skyfies gesny
Voorverhit die oond tot 130C en voer 2 bakplate met aluminiumfoelie.
Bestuif met mielieblom. Klits eierwitte in groot glasbak tot styf maar nie
droog nie. Voeg suiker lepelsgewys by terwyl dit aanhoudend geklits word. Hou
aan klits totdat alle suiker opgelos is. Verdeel mengsel in 2 en vorm 2
sirkels, 20cm in deursnee op bakplate. Bak vir 10 minute lank, verlaag dan
hitte na 110C en bak dan vir nog ‘n verdere 55minute of totdat die meringue
droog is of effens hol klink wanneer daarteen getik word. Verwyder uit die oond
en laat afkoel.
Klits karamel-kondensmelk, room, melk en kitspoeding vir vulsel saam
tot goed gemeng. Vou jogurt in en plaas in yskas tot wanneeer benodig. Skep op
meringue en rangskik piesang bo-op.
LEMOEN FUDGE YSKASTERT
200ml vars lemoensap
50ml Van der Hum-likeur
125g vingerbeskuitjies
200g melksjokolade, in blokkies gebreek
gerasperde skil van een lemoen
125ml room
30ml botter
50ml strooisuiker
10ml gelatien (gespons in 45ml water)
250ml room, ekstra
5ml vanieljegeursel
2 eierwitte
Meng lemoensap en likeur en giet in ‘n vlak skottel. Doop
vingerbeskuitjies hierin en rangskik die beskuitjies op die bodem van ‘n
tertbak. Drup enige vloeistof wat oorbly oor die beskuitjies. Smelt sjokolade,
lemoenskil, room, botter en strooisuiker oor warm water of in die
mikrogolfoond. Smelt gelatien en roer by gesmelte sjokolade. Laat effens afkoel.
Dit sal dikker word, maar moenie wag tot dit stol nie. Klop room styf en vou saam
met vanieljegeursel by sjokolademengsel. Was klitser en klop eierwitte styf.
Vou ook by sjokolademengsel in. Gooi oor beskuitjies in tertbak en plaas in
yskas tot gestol.
Lewer 6-8 porsies.
PERE-VREUGDE
1 eetlepel gelatien
250ml warm melk
3 eetlepels strooisuiker
250ml fyngemaakte pere
¼ koppie koue water
3 eiers, geel en wit apart
5ml vanielje geursel
12.5ml suurlemoensap
250ml room